जुन्या आणि ऐतिहासिक कल्याण गावाची ओळख आणि इतिहासाचे साक्षीदार असलेल्या काही प्रमुख ठिकाणांपैकी एक असलेला पारनाका हा कल्याणकरांसाठी कायम जिव्हाळ्याचा विषय राहिला आहे. या पाराला ऐतिहासिक आणि अध्यात्मिक वारसाही लाभलेला आहे. याठिकाणी असलेला पार आणि त्याखाली असणारे श्री.गणरायाचे मंदिर हे अनेकांचे श्रद्धास्थान आहे. मात्र, काळाच्या ओघात जिर्णावस्थेत गेलेल्या मंदिराचे जतन करणे आवश्यक होते. स्थानिकांनीही त्यासाठी आपल्याकडे तशी विनंती केली होती. या विनंतीनुसार, सर्वांचे संकट हरण करणाऱ्या या अधिपतींच्या मंदिराचा जीर्णोद्धार तसेच त्याशेजारील परिसराचा विकासात्मक कायापालट करण्यासाठी तब्बल 1 कोटी रूपयांचा भरीव निधी शासनाकडून उपलब्ध करून घेतला आणि त्यातून आज अतिशय सुंदर असे मंदिर आणि परिसराचे निर्माण काम होऊ शकले. ही देखील त्या गणेशाचीच कृपादृष्टी. कारण आपण केवळ निमित्तमात्र, ‘सर्व कर्ता करविता, तर शेवटी तोच!